Ein Wunder

Besinnung zu Psalm 8 von Pfarrerin Ruth Oppliger
25. Februar 2024

«Gott, wie herrlich ist dein Name in allen Landen,
der du deine Hoheit über den Himmel gebreitet hast.
Wenn ich deinen Himmel sehe, das Werk deiner Finger,
den Mond und die Sterne, die du hineingesetzt hast:
(…kann ich nur staunen!)
Was ist der Mensch, dass du seiner gedenkst,
und des Menschen Kind, dass du dich seiner annimmst?
Du hast ihn wenig geringer gemacht als Gott,
mit Ehre und Hoheit hast du ihn gekrönt.
Du hast die Menschen zu Bewahrerinnen gesetzt über das Werk deiner Hände,
alles hast du ihnen unter die Füsse gelegt.
Gott, wie wunderbar ist dein Name in allen Landen.»

nach Psalm 8

Staunen

D Wort im Psalm 8 drücke Stuune us:
-Zersch äs Stuune über Gott, über d Schöpferin, wo aus gschaffe het. Himmu u Ärde, Tier u Pflanze, aues isch ds Wärch vo de göttleche Häng. Gross u wunderbar isch dr Name vo Gott.
-Derzue chunnt ds Stuune über ds Läbe vo üs Mönsche. Was isch dr Mönsch, dass du a üs däichsch? Was isch jedes Ching, dass du ihns animmsch?
Mit dene Froge wird dütlech gmacht, dass jedes Läbe im Gheimnis vo Gott gründet. Wüu mir Gschöpf si, wüu Gott a üs däicht, isch jedi u jede einzigartig u kostbar.

Wunder Mensch

Was isch dr Mönsch? Dr Mönsch isch äs Wunder. Gott ähnlech si mir gmacht, heissts im Text vom Psalm 8. Mi düecht, dass das Ehrfurcht uslöst, vilicht ou Nachdänklechkeit. Dass Mönsche vo Gott mit Ehr gsägnet wärde, bedütet nämlech ä grossi Ufgab. Mönsche träge Verantwortig für aus Gschaffene. Ds Läbe isch äs Wunder. Das grosse Wunder vom Läbe erfahre mir bir Geburt vome Ching ganz bsungers. Ä unbeschrieblechi Freud, äs riesigs Glück. Gliichzitig wird bi däm überwäutigende Ereignis ou d Verletzlechkeit vom Läbe erfahrbar. U äbeso wird di grossi Verantwortig für das neue Läbe für d Eutere spürbar.

Wunder. Näbscht de gröschte Wunder, gits ou di chlinere u autägleche Erläbnis, wo wunderbar würke. Weli Erfahrige mit Wunder mache mir? Was düte mir aus Wunder? I däiche, dass isch sehr persönlech u für aui ungerschiedlech. Wi heisst für euch d Antwort?

D Ching us dr KUW 2 Klass hei äs paar Bispiu vo Wunger formuliert:
-D Muschle, wo am Meer chöi gsammlet wärde.
-Ä Stärn, wo im Dunkle lüchtet.
-D Chatz isch fasch tot gsi, aber si het überläbt.
-Äs Decheli, wo d Grossmueter het gstickt, mitem Name u Geburtsdatum.
-Dr chliin Brüetsch, wo zersch nid guet isch is Läbe gstartet u jetz aus Familiemitglied aune Freud macht.

Für mi säuber isch dr ganz Verlouf vom Läbe wunderbar. Jedes Auter isch bsungrig u bringt wichtige Erfahrige. Ou Sorge u Ängscht, Enttüschige u Verletzige ghöre derzue. Grad denn, we mir ir Verzwiflig neue Muet fasse, denn zeigt sech ds Wunger vom Läbe bsungers. Äs grosses Wunder isches gäng, we d Hoffnig nid verlore geit, denn we mir nach schwierige Erfahrige, nach dunkle Zyte wieder ä Liechtblick gseh.

Symbol Hyazinthe

Was äs Wunder isch, das zeigt mir säuber ganz dütlech d Natur. Ds Wachse u ds Vergo isch ime ewige Kreislouf ibunge. Äs isch jetz no Winter, Horner, aber Schnee muess me wiit go sueche. Hie zeige sech im Garte scho Winterlinge, Schneeglöggli, Krokussli, Schlüssublüemli, -erschti Botinne vom Früehlig. Das isch ou bedänklech, dass es scho so warm isch. Grundsätzlech tuet aber das neue Wachstum jedes Johr wieder guet. Äs isch ä Hiwiis uf d Macht vom Läbe.

Letscht Herbscht hani im Chäuer äs bsungrigs, bruuns Gfäss us Glas entdeckt: Äs isch äs Hyazintheglas, vo mir Grosstante. I ha mi erinneret, wi äs paar sölegi Gläser aube bi üs doheim si ufem Fäistersims gstange, dinne ar Wärmi. Vo dusse het d Sunne ad Schiibe gschine u d Früehligsblueme si gwachse. I ha mr vorgno, dassi das Glas im nächschte Früehlig wott i Gebruch nä. Vor äs paar Wuche hani ä schiinbar vertrochneti Bluemezibele gno u ha se uf d Verängig im Glas mit Wasser gleit. Öppe na 3 Tag si scho 1 cm längi Würzeli gwachse gsi. Später de si obe d Blätter cho u de het sech langsam d Blüete entfautet. Bi däm autägleche Vorgang zeigt sech für mi äs Wunder. Das bringt mi zum Stuune. Das Stuune löst Achtig us gägenüber em Läbe u füehrt mi zure Ehrfurcht vor der Macht, wo das aus erschaffet.

Wunder Gemeinschaft

Mir Mönsche si Teu vor Schöpfig u mir si mit bsungrige Ufgabe gsägnet, so säges ds Wort usem Psalm 8. Aus Bewahrerinne u Mitschaffendi si mir verantwortlech für üsi Mitgschöpf. So wi mir nume i Beziehig zum Göttleche existiere, so läbe mir gäng i Bezug zu angerne Mönsche. Mir si soziali Wäse u si ibettet ine Mitwält us Tier u Pflanze. Äs brucht d Wärtschätzig u d Achtig gägenang u ungerenang. Ohni das setzte mir aus ufs Spiu u mache viu kaputt. Das isch nid dr Wiue vo Gott.

Wes im Psalm heissts, dass Gott üs mit Ehr krönet, de si mir em Läbe u sim Schutz verpflichtet. Gott setzt üs ä Chrone uf u nimmt üs dermit id Verantwortig, em Läbe z diene, nid z schade. So chöi mir üs am Läbe freue! Äs isch äs Wunder.

Derzue zum Schluss ä schöni Gschicht…

Die Blumen des Blinden

frei nach H.L.Gee

Ime chline Huus miteme grosse, wunderbare Garte het ä blinge Ma gläbt. Trotzdäm, dass er nüt gseht, pflegt er mit Hingab si Garte. Früehlig, Summer u Herbscht isch dert äs Blüetemeer. Im Winter liegt dr Garte friedlech do u dr Ma wartet sehnlech ufs Liecht vom Früehlig.

Ou we sini Ouge nid gseh, so nimmt er d Häuigkeit wahr u gspürt d Sunnestrahle, gniesst di längere Tage u tanket gnüsslech Wärmi. Mit Spannig erwartet är di erschte Blueme: Winterlinge u Krokusse, Primeli, Gloggeblueme u Hyazinthe. Aer läbt vo sine Blueme im Garte. Einisch chunnt öpper bi ihm verbi. Dä stuunet über dä wunderbar Früehligsgarte.

Är wunderet sech glichzitig drüber, dass dr bling Ma sech so viu Müeh macht mit eme Garte, woner säuber gar nid gseht. Worum machet dir das? frogt är ihn.

Dr bling Ma het glächlet u gseit: Derfür gists verschiedeni Gründ. I mache gärn Gartearbeit. I cha ds Liecht gschpüre, äbeso ou dr Räge. D Blueme chani arüehre u schmöcke. U derzue, u das isch dr wichtigst Grund, machenis für di angere Lüt, wi für euch! I ha gwüsst, äs chunnt öpper verbi, wo mit mir redt u mit mir d Fröid teut.